MAANA YA SALA YA “SALAMU MARIA”

Utangulizi:

Ili tunufaike na mada hii, hebu tuanze kwa kuorodhesha maswali au dukuduku zote tulizo nazo kuhusu Mama Bikira Maria. Natumaini baada ya kupitia kurasa hizi kwa makini tutakuwa tumepata majibu karibu yote. 

Baadhi ya maswali tuliyozea kuyasikia kuhusu Mama Bikira Maria kama shutuma dhidi ya wakatoliki:

·         Kwa nini wakatoliki wanamwomba Maria badala ya kumwomba Mungu moja kwa moja?

·         Maria ni Bikira daima?

·         Kwanini wakatoliki wanamwita Maria Mama wa Mungu?

·         Wakatoliki wanamwabudu Maria na watakatifu wengine?

·         Yesu alikuwa na ndugu wa kiume na wa kike kwa mama mmoja (Maria)?

·         Kwa nini Maria alipalizwa mbinguni?

·         Je, Maria alikuwa na hiari kuhusu kukubali au kukataa kuwa Mama wa Yesu?

·         Je, Maria na Yesu wangeweza kutenda dhambi?

·         Kwanini tunasali Salamu Maria mara kumi na Baba yetu moja tu katika sala ya Salamu Maria?

·         Kwa nini tuvae skapulari?

·         Kwanini wakatoliki wanaamini na kufundisha vitu ambavyo havijaandikwa kwenye Biblia? (Yn 21:25, Lk 10:16, 1Timoteo 3:15, 2The 2:15)

·         Wakatoliki wanawaomba wafu?

·         Wakatoliki wanaabudu picha na sanamu?

·         Kusali kupitia watakatifu sio kumwibia Mungu utukufu wake?

·         Nk.

Lengo kuu la mada hii ni kuwezesha tafakari ya sala ya Salamu Maria.

“Salamu ewe uliyejaa neema” (Luka 1:28a)

Nilikuwa naangalia televisheni siku moja, kilikuwa ni kipindi cha mchungaji mmoja maarufu hapa nchini. Niliona kuwa wakati wa kufanya huduma ya uponyaji na kufukuza pepo, kijana mmoja aliyekuwa amevaa Rozari shingoni, alijitokeza kwa ajili ya huduma hiyo, na mchungaji alimwambia aivue Rozari hiyo kwanza kwani ndio kizuizi cha uponyaji wake, na yule kijana akaivua na kuitupa chini, watu wakaendelea kuikanyaga…….. Nilishituka sana na ilinipa kutafakari tukio hili na mengine yanayofanana na hayo kwa muda mrefu. Kuna mambo mawili. Inawezekana mchungaji huyu aliogopa kutoa “huduma” yake kwa mtu aliyevaa Rozari kwa sababu alikuwa anatumia nguvu inayopingana na Mama Bikira Maria? Au; labda alimwandaa mtu huyu ili apate nafasi ya kuidhalilisha Rozari Takatifu kwa sababu alitaka kulipiza kisasi kwa Mama Bikira Maria? Kwa vyovyote huu ni mfano wa matumizi mabaya ya Jina la Yesu.

Shetani hawezi kumdhuru mtu mwenye kinga ya Mama Bikira Maria. Mfano B: Msichana mmoja aliyekuwa anampenda sana Bikira Maria na anaomba ulinzi wake mara kwa mara, siku moja alitekwa nyara na waabudu shetani ili  akatolewe damu ya kafara. Kwanza walimfungia kwenye chumba huku wakiandaa sehemu ya kumchinjia, kisha wakaenda kumchukua kwenye kile chumba (muda wote alibaki anasali kwa Bikira Maria). Wauaji hao walipomwangalia mara anabadilika badilika sura, wakati mwingine wanamwoma kama yeye, na wakati mwingine wanaona sura yake imebadilika amekuwa kama Bikira Maria. Ndipo walipomfukuza Yule binti, huku wakimwambia aliyeleta ile kafara kuwa kafara hiyo haiwafai. Ndivyo yule msichana alivyonusurika kifo.

Mfano C: Kijana mmoja aliingia mkataba na shetani ili afanikiwe mambo yake, lakini mama yake alikuwa mtu wa ibada sana kwa Mama Maria, na akawa amemvalisha mtoto wake skapulari ya Bikira Maria tangu akiwa mtoto, naye hakuwahi kuivua. Baadae shetani alimfuatilia yule kijana kuhusu mkataba wao kuwa ili yeye afanikiwe duniani, itambidi ampatie shetani chochote atakachohitaji kwake. Siku moja shetani alihitaji yule kijana ajiue, na akampeleka hadi kwenye kisima kirefu na kumuamuru ajitupe humo ili afe. Yule kijana alikaa kwa muda mrefu pembeni ya kisima kwa hofu kuu ya kifo. Shetani alipomharakisha, kijana akamwambia, mimi naogopa sana kufa, nashindwa kujitupa humu kwenye kisima, tafadhali nisukume. Shetani alirudi nyuma na kumwambia, vua kwanza hiyo skapulari kisha nitakusukuma. Yule kijana mara akakumbuka kuwa anayo kinga dhidi ya shetani, ni hiyo skapulari, na shetani hawezi kumgusa akiwa ameivaa. Kijana akamwambia shetani kuwa kama hamsukumi aondoke maana yeye hatajitupa humo kamwe. Shetani baada ya kufanya vurugu nyingi na kelele za hasira akaondoka na kumwacha kijana peke yake, hakuweza kumgusa. Baada ya kijana kujikuta peke yake alijikokota hadi kanisani huku akilia sana akamweleza Padri kila kitu, akaungamishwa dhambi zake zote, na baada ya hapo maisha yake yote yakabadilika, akiwa anatoa ushuhuda kwa yaliyomkuta na jinsi alivyonusurika kifo cha mwili na cha roho milele.

Katika Sikukuu ya Bikira Maria Mkingiwa dhambi ya asili tunamkumbuka Bikira Maria aliyekingiwa dhambi ya asili. Ni fundisho la Kanisa ambalo kila Mkatoliki lazima alikubali (Dogma). Sawa. Kama wakatoliki tunajua kuwa Sanduku la Agano linalonenwa katika Agano la Kale ni kivuli cha Bikira Maria katika Agano Jipya. Na kwa vile Maria ni Sanduku la Agano katika Agano jipya, ina maana kuwa hana doa lolote. Kwa sababu, kwa vile Mungu ni Mtakatifu sana, na Mungu ni Roho, hawezi katika hali yake hiyo kama Roho, kugusana na dhambi, na hivyo hawezi kuchukua mwili wa kibinadamu kutoka katika chombo kichafu. Kwa hiyo, Maria hawezi kuwa kwamba alikuwa na dhambi ya asili. Sawa. Tunakubali yote haya.

Lakini, ili kuelewa kwanini Maria alikingiwa dhambi ya asili, hatuna haja ya kutafuta majibu magumu, kwani Malaika Gabrieli anatufunulia haya yote katika salamu yake wakati Neno (Mungu nafsi ya pili ambaye alikuwa Roho tu) alipofanyika Mwili (na kuwa Mungu-Mtu). “Salamu, ewe uliyejaa neema! Bwana yu nawe”. Gabrieli anampa Maria jina la “Aliyejaa Neema”, na cheo hicho peke yake, kinajitosheleza katika kutujulisha kuwa Maria hana dhambi yoyote.

Inawezekanaje?                               Dhambi ni nini kwani?

Eeh., dhambi ni pale tunapofanya mambo mabaya. Hapana, hayo ni madhara ya dhambi. Dhambi ni nini?

Eeh…, dhambi ni pale tunapomwacha Mungu na kumgeukia kiumbe. Hapana, hayo ni matokeo ya dhambi. Dhambi ni nini?

Dhambi ni ugonjwa wa kiroho, kansa, uchafu uliogandamana nasi, ambao unaziba roho zetu na kutuzuia kufanya mambo ilivyo sawa. Hapana! Hiyo ni tafsiri potofu iliyozoeleka kuhusu maana ya dhambi.

Dhambi siyo ugonjwa wa kiroho. Dhambi siyo kansa ya kiroho. Dhambi siyo uwepo wa kitu fulani ndani mwetu ambacho hakistahili kuwa humo.

Ila, dhambi ni matokeo ya ukosefu wa kitu ambacho kilipaswa kiwe ndani yetu. Ni kitu gani hicho?

NEEMA! Dhambi ni matokeo ya ukosefu wa neema. Kaangalie kwenye Kateksimu yako vizuri utaona jibu hili.

Hivyo, iwapo dhambi ni ukosefu wa neema, na iwapo mtu anaitwa na Malaika wa Mungu kama “aliyejaa neema”, ni nini ambacho hakiko kwake? DHAMBI! Ona kwamba,  Gabrieli anamwita Maria “aliyejaa” neema, siyo anayejaa neema, au atakayejaa neema. Bali aliyejaa neema. Wakati uliopita. Hili ni jambo ambalo lilishafanyika. Maria amejaa neema. Kama Maria amejaa neema, hakuna nafasi ya dhambi ndani yake.

Sawasawa, lakini Maria alipataje kuwa aliyejaa neema? Asante kwa kuuliza. Maneno ya Malaika Gabrieli yanayofuatia yanajibu swali hilo. “Bwana yu nawe”. Ndugu zangu, hiyo ndiyo maana ya neema wapendwa, uwepo wa Mungu!. Neema maana yake hasa ni “uwepo wa Mungu ndani ya maisha yetu”. Kwa hiyo, kuwa aliyejaa neema, ni kuwa aliyejaa na uwepo wa Mungu.

Tunapokeaje neema? Kwa njia ya Sakramenti.

Maria alipokeaje neema? Kwa njia ya Sakramenti. Eeeh! Hebu subiri kwanza! Unatuchanganya. Maria hakupokea Sakramenti!...

Ndiyo, Maria alipokea Sakramenti! Maria alipokea Sakramenti Kuu. Yesu ni Sakramenti ya Milele. Yesu ni Sakramenti iliyo hai ambaye kutoka kwake Sakramenti nyingine zote hutoka na kutupa uhai. Na alikuwa katika hali hiyo ya umoja wa kimwili na Sakramenti Hii kwa miezi tisa mfululizo. Hebu tafakari jambo hili kidogo.

Tuseme mtu anaanza kupokea Komunyo Takatifu akiwa na umri wa miaka saba, na mtu huyu anahudhuria Misa Takatifu kila siku kwa maisha yake yote, na anapokea Komunyo kila siku, mpaka anapofikia umri wa uzee miaka tisini na saba. Tunaamini kuwa kila tunapopokea Komunyo Takatifu, ambayo ni Mwili na Damu, Roho na Umungu Halisi wa Bwana wetu Yesu Kristu, tunakuwa katika hali yaa muunganiko wa kimwili na Mungu, kwa muda wa kama dakika mbili. Sasa tukichukulia kuwa mtu yuko katika hali ya neema ya utakaso, na mtu huyu akaishi hadi miaka 97, na akaja Misa kila siku na kokomunika bila kuruka hata siku moja, hakuugua wala kupokea Komunyo bila kustahili, hakutenda dhambi ili aruke kukomunika, mtu kama huyo atakuwa amekuwa katika hali ya muunganiko kamili na Mungu kwa kama siku arobaini za maisha yake. Piga mahesabu. Huu ni kama mfano tu.

Hakuna uwezekano mkubwa zaidi ya huo ukiangalia hali ya kawaida ya maisha yetu. Maria alikuwa katika muunganiko kamili na Sakramenti Hai, Mungu wa milele, Neno wa Mungu, Nafsi ya pili ya Utatu Mtakatifu, kwa muda wa miezi tisa mfululizo!. Ni kama siku 270! Angewezaje kuwa na upungufu wa neema? Angewezaje kuwa na dhambi?

Enheeee. Sasa tumekukamata! Kwa sababu Malaika alisema maneno hayo kwa Maria kabla hajapashwa habari! Unawezaje kusema kuwa alipokea Neema hiyo kutokana na muunganiko wake na Sakramenti Hai na ya Milele?

Ni kwa sababu daima tunapaswa kukumbuka kuwa, wakati sisi wanadamu tunafikiria kwa kutumia muda na nyakati, Mungu hazuiliwi wala kubanwa na muda. Na kama Yesu ni Mungu wa Milele, Nafsi ya Pili ya Utatu Mtakatifu, basi matendo yake ya wakati uliopo yanaathiri wakati ujao na wakati ULIOPITA. Lazima iwe hiyo, kama sivyo, basi Yesu siyo wa milele, na kama Yesu siyo wa milele, sadaka yake pale Kalvari ingalikuwa na uwezo tu wa kuwakomboa watu waliokufa kabla yake. Na kama ndivyo, imani yetu haina maana kwa sababu sisi tuliokuja baada ya kile kifo chake Kalvari hatujakombolewa na tumaini letu katika ufufuko baada ya kufa ni bure.

Kama Yesu ni Mungu, basi lazima Yesu ni wa milele, na SASA yake inaathiri sio sasa hivi tu bali pia inaathiri kesho na jana na milele (wakati uliopo, uliopita na ujao). Kwa hiyo Maria aliweza kuwa “aliyejaa neema” kutokana na muunganiko wake na Sakramenti Hai na ya Milele, ambayo ni Mwanae Yesu, kabla hata ya Neno kufanyika Mwili tumboni mwake.

Lakini sisi hatuwezi kuwa “waliojaa neema”. Zawadi hiyo ilikuwa spesheli kwa ajili ya Maria peke yake. Tunachoweza kutumainia ni “kujazwa na neema”, na ili hilo litokee inatubidi tuwe tunashiriki Sakramenti mbalimbali za Kanisa mara nyingi. Kumbuka, mara nyingi tunashindwa kushiriki Sakramenti za Kanisa na hivyo tunashindwa kuunganika kimwili na Mungu kwa sababu mbalimbali kama vile kutokwenda Misa kila siku, kwenda Maungamo mara chache tu na hivyo dhambi zetu zinamzuia Mungu kutujaza na neema anazotaka kutujalia. Na kama hatuungami mara kwa mara tena au tunakomunika kwa kukufuru au hatukomunika mara kwa mara, na yote hayo ni muda ambao haurudi katika maisha yako.

Na sasa tujiulize, ni namna gani tunapaswa kujitahidi kwa bidii kuhudhuria Misa kila siku, ili tuunganike na Mungu wetu katika Komunyo Takatifu (Anilaye mimi ataishi milele – Yn 6:48-58). Tunapokula chakula cha kawaida, kile chakula kinameng’enywa kinakuwa sehemu ya mwili wetu; ila tunapomla Mwana wa Mungu Yesu Kristu, yeye anatumeng’enya sisi tunakuwa sehemu ya Mwili wake Mtukufu, nasi tutafufuka pamoja naye siku ya mwisho na kutawala naye milele). Yatupasa kuondoa vizuizi vyote vinavyotuchelewesha au kutuzuia kupokea Sakramenti za Kanisa.

Kwa njia ya Sakramenti ya Ekaristi, sisi ni Mwili mmoja ule ule, Mwili wa Fumbo wa Kristu. Kwa sababu wote tunashiriki mkate mmoja na kikombe kimoja.

Tumwombe Mungu leo, kwamba Maria, Mama yetu na Mwombezi wetu, atuombee ili sisi wote tujazwe na neema. Salamu Maria……

Bwana yu pamoja nawe (Luka 1:28b)

Malaika anamaanisha nini anapomwambia Maria “umejaa neema”? Tafsiri ya neno neema ni “uhai wa Mungu ndani mwetu”, kwa hiyo Maria amejaa neema, kwamba amejawa na uwepo wa Neno wa Mungu aliyefanyika Mtu. Na akiwa amejawa na Neema hiyo, ina maana kuwa Bwana yu naye. Kwa sababu Neema haiwezi kukaa nje ya uwepo wa Mungu. Pale uhai wa Mungu ulipo, ndipo hapo Mungu alipo. Neema ni uwepo wa Mungu.

Kwa hiyo, kwa kuwa amejaa neema, ina maana kuwa Maria kamwe hatakuwa peke yake, Mungu atakuwa naye daima. Na hili sio jambo dogo. Turudi katika kitabu cha Mwanzo cha Biblia.

Kila tunapoadhimisha Sikukuu ya Bikira Maria Mkingiwa dhambi ya asili, tunasoma kutoka kitabu cha Mwanzo cha Biblia, ambapo Mungu anawagombeza Adamu na Eva kwa kula tunda lililokatazwa, na anapotangaza kuwa mwanadamu na nyoka daima watakuwa maadui. Hatuwezi kuelewa vizuri Fumbo la Mungu kufanyika Mtu kama hatajaelewa vizuri sehemu hii ya kitabu cha Mwanzo cha Biblia na matokeo yake. [Mwanzo 3: 1-15].

Nini kinatokea mara baada ya Mungu kumuumba Adamu? Anasema, “Sio vizuri huyu mtu kuwa peke yake” (Mwanzo 2:18). Na hivyo anamuumba Eva kutoka kwa Adamu.  Na hilo pia ni muhimu. Siku hizi wanaharakati wa kike hawapendi mstari huo kwenye Biblia kwa sababu wanadhani unakazia kuwa mwanamke ni mdogo kuliko mwanaume, na kwamba pengine nia ya mwandishi wa sentensi hiyo ilikuwa kuonyesha ubabe wa jinsia ya kiume. Hio sio sahihi. Hiyo sio maana sahihi ya mstari huo katika Biblia.

Eva anaundwa kutokana na Adamu ili kuonyesha kuwa hao wawili ni sehemu moja, wanategemeana (Mwa 2:23). Wanatokana na nyama ile ile na mfupa ule ule. Kwa sababu tumeumbwa hivyo, ili tuwe na mahusiano na kila mmoja wetu na pia tuwe na mahusiano na Mungu wetu. Ndio maana Mungu hamuumbi Adamu na Eva namna sawa na alivyoviumba vitu vingine vyote. Mungu anaongea na vitu vingine na vinapata kuweko. “Pawepo mwanga” na mwanga unakuwepo, nk. Adamu na Eva wao ni tofauti. Anawagusa. Anawatengeneza kwa mikono yake, kwa sababu anapenda awe karibu nao, awe na mahusiano nao, na anapenda wawe karibu na wawe na mahusiano wao kwa wao.

Katika mazungumzo na nyoka (Mwa 3:1-15) nani anajibu maswali yote? Eva. Nani yuko kimya? Adamu. Hatimaye wanaposhawishika kufanana na miungu, nani anapokea lile tunda? Eva. Nani anapokea tunda kama kipofu? Adamu. Anafuata mkumbo tu. Mungu anapowahoji, anamwita nani? Adamu. Adamu anamlaumu nani? Eva na Mungu.

Lakini Mungu anapomhoji Eva, Eva anafanya nini? Eva anasema kila kitu. Katika mazungumzo haya yote Eva ndie jasiri. Adamu ni mfano wa mume dhaifu, na ndio maana tukio hili limerekodiwa katika Biblia kama “dhambi ya Adamu” na sio “dhambi ya Eva”, kwa sababu Adamu sio tu alishindwa kumtii Mungu, bali pia alishindwa katika wito wake.

Kwanini Adamu hakuongea na yule nyoka? Kwa nini Adamu hakumsaidia mke wake? Haikuwa vigumu sana kufanya hivyo, angeweza kumwambia tu, “Njoo Eva, twende zetu. Sihitaji kula tunda saa hizi”. Hii ndio sababu anguko la wazazi wetu wa kwanza lilitokea. Mungu alimwumba Eva kutokana na nyama ile ile aliyokuwa nayo Adamu, ili wawepo kila mmoja kwa ajili ya mwenzake. Na Adamu alishindwa kuwepo kwa ajili ya mke wake wakati Eva alipomhitaji zaidi, wakati wa unyonge wake. Alimwacha peke yake! Ndio, Adamu alikuwa pale, ila hakufanya uwepo wake uwe wa msaada kwa Eva. Ndio maana Bwana Mungu alisema, “Sio vema mtu huyu akae peke yake”, kwa sababu Mungu alifahamu kuwa vishawishi vya shetani vingeweza kumshinda mtu mmoja kama yuko peke yake. Tunahitaji kusaidiana kama Jumuiya. Tunahitaji kuwa karibu na watu wema ili tuweze kudumu katika njia ile nyembamba na iliyonyooka.

Na ninaposema “kuwa na mahusiano”, simaanishi mahusiano ya wanandoa kwa maana ya tendo la ndoa nje ya ndoa. Kuna namna nyingi za kuwa na mahusiano au ukaribu na watu bila kufanya tendo la ndoa. Unaweza kufanya tendo la ndoa na mtu usiyemfahamu bila kuwa na ukaribu wowote naye, akaendelea kuwa mgeni kwako. Nadhani nimeeleweka.

Kwa hiyo, dhambi ya asili ilitokea kutokana na kukosekana kwa mahusiano. Nini kinatokea baada ya hapo? Adamu na Eva wanajifunika na majani ya miti. Ni kama wanajificha zaidi kwa kila mmoja wao (wanafichana sehemu zao za siri).

Kisha wanajificha kutoka kwa Mungu. Mungu alituumba ili tuwe na ukaribu naye na pia tuwe na ukaribu sisi kwa sisi. Kilichoharibu mpango huo wote ni matokeo ya dhambi. Hadi leo dhambi ina matokea makuu mawili yale yale: Inaharibu uhusiano wetu na Mungu, na inaharibu mahusiano yetu sisi kwa sisi.

Na mambo haya mawili yanarekebishwa kupitia Bikira Maria Mkingiwa dhambi ya asili.  Kwa sababu Maria amejaa kabisa neema ya Mungu, na Mungu yu pamoja naye, Neno wa Mungu anamuingia kwa njia ya Roho wake Mtakatifu, na Mungu na Maria wanakuwa ni kitu kimoja. Mahusiano kati ya Mungu na mwanadamu yanarejeshwa.

Uhusiano huo na Mungu unatufikia sisi kwa njia ya Ekaristi Takatifu. Sio uhusiano kamili, na hautakuwa kamili, hadi tutakapofika mbinguni, lakini ule ufa kati ya Mungu na sisi ulizibwa, kwani kwa njia ya Ekaristi tunakuwa nyama ile ile na mfupa ule ule sisi na Mungu. Sisi kama mtu mmoja mmoja lakini zaidi sisi kama Kanisa, tunakuwa Mwili mmoja na Mungu. Soma tena (Mwa 2:23). Mimi napenda kufikiria kuwa ni Yesu atuambia maneno hayo hasa mara baada ya kukomunika.

Akiwa pale Msalabani, Yesu alimwambia Maria, “Mwanamke, tazama mwanao”, kisha akamwambia Yohana, yule mwanafunzi aliyempenda, “Mwana, tazama Mama yako” (Yn 19:26-27). Yesu anamwita Maria “Mwanamke”, ni neno lile lile ambalo Maria anaitwa na Mungu katika kitabu cha Mwanzo (Mwa 3:15). “Mwanamke”. Kwa hiyo, kama vile ambavyo Eva alikuwa mama wa kimwili wa sisi wote, ndivyo hivyo hivyo Maria anakuwa Mama yetu wa kiroho sisi wote. Na hii inawezekana kwa njia ya Kanisa. Kwa njia ya Kanisa sisi ni wanafamilia moja tena kama ilivyokuwa hapo kwanza.

Shetani hana nguvu nasi tena, ndugu zangu, kwa sababu, hakuna hata mmoja wetu mwenye sababu ya kuwa peke yake tena. Kwa njia ya Ekaristi, tuna uhusiano na Mungu (uhusiano wa damu na wa nyama), na kwa njia ya Kanisa tuna uhusiano na kila mmoja wetu. Kitu pekee kinachoharibu uhusiano huu ni dhambi, na tunayo Sakramenti kwa ajili hiyo pia.

Sasa kwa sababu ya Bikira Maria kukingiwa dhambi ya asili, kupitia Ekaristi sisi nasi tunaweza kujaa neema. Sasa, kwa sababu ya Bikira Maria kukingiwa dhambi ya asili, kupitia Kanisa lake, Bwana yu pamoja nasi pia.

Mama wa Neno aliyefanyika Mtu, Maria Imakulata, utuombee.

Umebarikiwa kuliko wanawake wote (Luka 1:28c)

Kila wakati tunaposikia neno “umebarikiwa” likitumika katika maandiko, linamaanisha mambo fulani. Kimsingi linamaanisha muunganiko na Mungu, au mahusiano ya kipekee na Mungu. Maneno “umebarikiwa kuliko wanawake wote” hayasemwi na Malaika Gabrieli wakati Neno anapofanyika Mwili, bali yanasemwa na Elizabeti, wakati Maria anapomtembelea kumsaidia katika ujauzito wake.

Luka 1:26-44.

Sasa tuangalie jinsi hii inavyotokea. Maria anasafiri hadi nchi ya milimani na kumwamkia Elizabeti wakati anapoingia nyumbani kwake. Mara Elizabeti anaposikia sauti ya Maria anapomsalimia, kitoto kichanga tumboni mwa Elizabeti, Yohana Mbatizaji, kinaruka. Hapo ndipo Elizabeti anapojazwa na Roho Mtakatifu na kusema kwa sauti: « Umebarikiwa kuliko wanawake wote, naye mzao wa tumbo lako amebarikiwa! ».

Kwa hiyo sehemu ya kwanza ya « Salamu Maria », ni majumuisho ya jina ambalo Malaika Gabrieli anamwita Maria, na jina ambalo Elizabeti anamwita. Jinsi ile ile ambavyo Malaika Gabrieli anampa jina Maria mara ya kwanza anapokutana naye « uliyejaa neema », ni kwa jinsi hiyo hiyo naye Elizabeti anampa Maria jina mara ya kwanza anapokutana naye « uliyebarikiwa ».

Lakini Elizabeti hatoi maneno haya kwa hiari. Yote ni maneno ya Roho Mtakatifu. Bila shaka Bwana alimwambia Malaika nini cha kumwambia Maria anapofika kwake. Elizabeti anapoongea kwa kuangaziwa na Roho Mtakatifu inahitaji maelezo zaidi kidogo. Kwanza Elizabeti anasikia sauti ya Maria. Anasikia sauti yake yeye aliyekingiwa dambi ya asili. Anasikia sauti ya Bikira asiye na dhambi, ambaye sasa ana mimba ya Mungu, Neno aliyefanyika Mwili. Anasikia sauti hii na mara moja anaitikia.

Mwitikio huu unatoka kwake ? Hapana, mwitikio huu wa gafla hautoki kwake, unatoka kwa mtoto wake, ambaye ndie atakayefungua njia, nabii wa Neno aliyefanyika Mtu. Manabii walikuwa hawaongei vile wanavyojisikia wao. Walipofanya hivyo, walijikuta kwenye shida kubwa. Ilibidi waseme tu kile ambacho Roho wa Mungu aliwaamuru. Kwa hiyo Elizabeti anaposikia salamu ya Maria, Yohani Mbatizaji nae anaisikia, na anaruka kwa furaha.

Tumezoea kumsikia Yohane Mbatizaji akihubiri kwa ukali kuhusu toba, lakini kumbe mara ya kwanza tunapokutana naye, tunamkuta katika tendo la kumsifu Mungu. Yohane anaporuka kwa furaha, Elizabeti anajazwa na Roho Mtakatifu, na Yohane, ambaye yumo tumboni mwake, naye anajazwa na Roho Mtakatifu. Saa ile ile, Yohane Mbatizaji anakuwa Nabii, na kwa vile Yohane bado alikuwa hana sauti ya kutolea unabii wake, mama yake, Elizabeti, anamsaidia. « Umebarikiwa wewe kuliko wanawake wote ! ».

Mahali pengi katika Maandiko Mungu anatumia mfano wa mama na mtoto, kuonyesha ukaribu uliopo kati yake na sisi viumbe vyake.

[Kuna watu wengine wanajiita wakristu lakini wanadhani Biblia haijakataza utoaji wa mimba. Upofu huo!. Huko ni kutoyajali Maandiko].

Kwa hiyo Maria amebarikiwa, lakini kwa nini amebarikiwa? Siku moja mwanamke mmoja alimwambia Yesu, « Limebarikiwa tumbo lililokuzaa, na matiti yaliyokunyonyesha ! » (Lk 11 :27-28). Maneno hayo ni kama marudio ya maneno ya Elizabeti. Hata hivyo Yesu anajibu, « Wamebarikiwa wale wote wanaolisikia neno la Mungu na kulishika ».

Je, Yesu anabishana na maneno ya mwanamke huyu? Je, Yesu hapa anasema kuwa Maria hajabarikiwa ? Hapana, ila wakati huohuo, hapendi watu washindwe kuona jambo hili kwa upana wake. Sababu inayomfanya Maria awe aliyebarikiwa, ni sababu hiyo hiyo ambayo inaweza kutufanya kila mmoja wetu abarikiwe. Maria alilisikia neno la Mungu, na daima akalishika, Maria ndiye Mfuasi Mkamilifu. Daima anayafikiria matukio yaliyotokea katika maisha ya Mtoto wake, Neno wa Mungu.

Bwana Yesu anapata chakula cha jioni kwa mmojawapo wa Mafarisayo, na mmoja wa wageni anamwambia, “amebarikiwa yeye atakayekula katika ufalme wa Mungu”. [Luka 14:15-24]. Yesu anafanya nini? Anatoa mfano wa mfalme aliyeandaa karamu kwa ajili ya mtoto wake, na wageni walioalikwa wakakataa kuja, kwa sababu hii au ile, hadi mfalme kwa hasira anawaamuru watumishi wake kuwatafuta na kuwaalika watu wote mtaani, sokoni, vijijini na vichochoroni ili nyumba yake ijae. Mfalme akaapa kuwa hakuna hata mmoja kati ya wale walioalikwa atakayeonja karamu yake.

Wale wageni waalikwa walifanya nini kilichomwuudhi mfalme? Walitoa ahadi ambayo hawakuitekeleza. Waliweza kupata visingizio na mambo mengine muhimu kuliko ule mwaliko waliokuwa wamepata. Nasi kwa njia ya ubatizo, tumeitikia wito wa karamu ya mbinguni, lakini mara nyingi tunatafuta visingizio vingi vya kutufanya tusiitikie wito huo. Maria alifanya tofauti. Daima aliyaitikia mapenzi ya Mungu hadi Kalvari.

Ni wapi tunaliona neno “umebarikiwa” likitumika zaidi? Kwenye heri nane bila shaka (Mathayo 5:3-10). Biblia nyingine neno “heri” linatumika kama mbadala. Wamebarikiwa wale wenye umaskini wa roho, wamebarikiwa wale walio wanyenyekevu.....”. Ukichunguza heri zote hizi, utaona kuwa Maria aliziishi zote kwa ukamilifu. Ndio maana alibarikiwa, na ndivyo jinsi hiyo hiyo tunavyoweza nasi kubarikiwa.

Lakini, sio “umebarikiwa kuliko watu wote, au wanadamu, au viumbe”. Ni “umebarikiwa kuliko wanawake wote”. Kwa nini wanawake tu?

Maria amebarikiwa kuliko wanawake wote, kwa sababu amebadilisha laana ya Eva kuwa Baraka. Na Adam, ambaye alikuwa chini ya laana hiyo, naye amebarikiwa kwa sababu ya Maria.

Kweli Maria amebarikiwa kuliko wanawake wote. Kupitia kwake, Baraka za Mungu Baba zimewafikia wanadamu, na kuwaweka huru na laana iliyowafuatilia tangu dhambi ya Adamu.

Kupitia kwa Maria viumbe vyote vimebarikiwa, kwani uzao wake unabariki ulimwengu mzima na kuukomboa kutokana na laana. “Mwanadamu ni nani ee Bwana hata umwangalie?”(Zaburi 8:4-5).

Maria anatimiza kila wito wa mwanamke kwa ukamilifu. Maria ni Bikira, aliyejitoa kwa Bwana, tena Maria ni mke wa Yosef, aliyeozwa katika ndoa, Maria ni Binti wa Mungu Baba Mwenyezi, tena Maria ni Mama wa Mungu Mwenyezi.

Maria ni ndugu kwa watakatifu na kwa wadhambi. Ona kuwa, ni kina nani wanasimama pamoja na Maria chini ya Msalaba pale Kalvari? Ni Maria Magdalena, na Maria wa Kleofasi.  Maria watatu wapo Kalvari. Maria wa Kleofasi ni binamu wa Maria, ndugu yake wa damu. Maria Magdalena ni mdhambi aliyetubu, sasa ni ndugu wa Maria kwa njia ya damu ya Mwanakondoo. Maria ni ndugu yao wote. Wanatuwakilisha na sisi kuwa tu ndugu zake wapendwa Mama Maria katika utawala wa Mungu Mwenyezi.

Mambo haya yote yanamfanya Maria awe Mbarikiwa, na yote yamefungamana na mzao wa tumbo lake, Yesu.

**********************************************************

EVA WA AGANO JIPYA

Mwanzo 3:15, na 3:20, Ufu 12:1-6.

Fananisha Eva na Maria. Maria ni Eva Mpya. Yesu ni Adam mpya. Maria alijinyenyekesha kabisa (alijifahamu kuwa hana chochote bila Mungu Mkombozi wake - Soma Luka 1:46-48) na hivyo Mungu alipokuta moyo /kikombe chake ki tupu kabisa, akaweza kumjaza na neema zake hadi kikombe chake kikafurika. (Kizuizi cha neema za Mungu ni u-mimi tunaoshindwa kuutoa kwenye nafsi zetu, tunashindwa kujimwaga kabisa kwa Mungu kwa kuyakataa mapenzi yetu yote na kumwachia Mungu atende anayotaka katika maisha yetu. Kwa sababu tumepungukiwa na neema. Na hili tumeshalijadili hapo kabla).

Uzao wa Eva ulilaaniwa, hapa tunaona kuwa uzao wa Maria umebarikiwa. “na Yesu uzao wa tumbo lako umebarikiwa” Maria kama Mama wa kiroho wa wote walio hai, hapa tunamwona pia kama Mama wa Adamu. Neno “Yesu” hapa lina maana pia ya Adamu wa kwanza, pia lina maana ya mimi na wewe. Unaweza kuweka jina lako hapo na kutafakari hiyo sentensi kwa mwanga huo kwa sababu kupitia uzao wa Maria ambao ni Yesu, sisi nasi tumebarikiwa. Yesu ni Adam wa pili. Vitu vyote viliumbwa kwa ajili ya Adamu, alipewa hata jukumu la kuwapa viumbe vyote majina, na jina alilowaita Adamu likawa jina lao hata leo (Mwanzo 2:20). (maana, Adamu akikuita ndege utaanza kuruka angani nakuishi kama ndege).

Katika Agano Jipya tunaona kuwa Maandiko yanasema kuwa Yesu ndiye Adamu wa pili (au Adamu Mpya, au Adamu wa mwisho – 1 Wakorintho 15:45, Warumi 5:12-19, Kumb 19:21, Waebrania 10:12, 1 Wakorintho 15:22, nk). Vitu vyote vimeumbwa kwa ajili ya Yesu (Wakolosai 1:16). Sisi wote na viumbe vyote tumeumbwa naye na kwa ajili yake. Adamu huyu mpya ( naye anatuita kwa namna yoyote apendayo na jina analotupa ndilo litakuwa jina letu milele na hakuna wa kulibadilisha. Akikubariki hakuna wa kukulaani. Huyu ni Adam Mpya na wa milele. Adam wa kwanza alikuwa kiashiria tu cha Adam huyu. Yesu hawezi kuwa Adamu mpya bila kuwa Mwana wa Maria, ambaye kupitia kwake yeye Eva wa Pili, anapata Mwili wa kibinadamu kupitia unyenyekevu wa Maria (utupu wa Maria kuweza kuruhusu kujazwa na uwepo wa Mungu kwa asilimia 100%, “naye Neno akafanyika Mwili, akakaa kwetu”).

Nyoka amemdhibiti Eva, ila Maria amemkanyaga nyoka, hataruhusu ushindi wake. (Haya mambo kibinadamu yanatokea karne nyingi kati ya tukio moja na lingine, lakini katika ulimwengu wa roho, mambo haya yanatokea wakati ule ule. Ndio maana Mungu alisema “nitaweka uadui kati yako wewe na huyo mwanamke (angalia kuwa hasemi “huyu mwanamke”, akiashiria kuwa alikuwa anamaanisha mwanamke tofauti na Eva), kati ya uzao wako na uzao wake” na hapo Bwana Mungu alikuwa anazungumza na Eva na nyoka kuhusu mwanamke ambaye uzao wake utakikanyaga kichwa cha shetani).

*********************************************

Yoh 2:4 , 19:26 Yesu anamwita Maria “mwanamke” [kama ambavyo aliitwa katika Kitabu cha Mwanzo 3:15. Isaya 7:14,Mathayo 1:23] “Mungu pamoja nasi, Immanueli”

Luka 1:35  Na kile kitakachozaliwa kwako kitaitwa Mtakatifu, Mwana wa Mungu. - “Theotokos” (Mama wa Mungu).

“Aliyejaa neema” inatumika tena mahali fulani katika Biblia mara moja tu, kumhusu Yesu (Yohana 1:14)

Elizabeti anamsifia Maria kwanza kabla ya kumsifu Yesu. Sisi nasi twaweza kupitia kwa Maria kwenda kwa Yesu.

Mambo ya Nyakati 15: (hasa kuanzia aya ya 14…. Pia sura ya 16) - tunaona kuwa Wayahudi walionyesha heshima ya kipekee kwa Sanduku la Agano (la Kale) – ibada, mavazi rasmi, nyimbo, vinubi, matarumbeta, nk. Hata sisi tunapaswa kuonyesha ibada ya kipekee kwa Sanduku la Agano Jipya.

Luka 1:39 / 2 Samweli 6:2. Maria aliondoka na kwenda / Daudi aliondoka na kuliendea sanduku la Agano.

Luka 1:41 / 2 Samweli 6:16 Yohana Mbatizaji / Daudi anaruka kwa furaha mbele ya Sanduku la Agano. Nasi inatubidi turuke kwa furaha mbele ya Maria, au tunapoisikia sauti au uwepo wa Maria turuke kwa furaha nafsini mwetu.

Luka 1:43 / 2 Samweli 6:9. Inakuwaje Mama / Sanduku la Agano la Bwana kunijia? Ni fursa takatifu Mama yetu anataka kuja kwetu ili kutupeleka kwa Kristu.

Luka 1:56/2 Sam 6:11 na 1 Nyakati 13:14. Mama /Sanduku la Agano lilibakia katika nyumba ile kwa muda wa miezi mitatu.

Maria alijifungua bila uchungu (Isaya 66:7) kwa sababu uchungu wa uzazi ni matokeo ya dhambi ya asili ambayo hakuwa nayo. Ila, Maria anatuzaa sisi wengine wote (ndugu zake Yesu) kwa uchungu mkubwa pale Kalvari chini ya Msalaba. Anatuzaa katika uzima wa milele (Ufu 12:4).

Ufunuo 12:13-16 tunaona kuwa shetani anaendelea kujaribu kumdhuru Maria hata baada ya kuzaliwa Mwokozi. Hii ni kuthibitisha kuwa lengo la shetani sio kumwangamiza Yesu peke yake, hata Maria ni wa hatari kwa mipango yake. Hii ni kwa sababu Mungu amempa Maria uwezo mkubwa wa kutuombea (ni kama kusema kuwa kwa sasa Maria bado ni mjamzito, sisi wote tuko tumboni mwake, na atatuzaa kwenye uzima wa milele kwa uchungu mkubwa, na sisi kama Kanisa tutapelekwa sehemu ambayo Mungu alishatuandalia tangu kuwekwa misingi ya dunia) Ufu 12.

Nafasi ya Malkia katika ufalme: 1 Wafalme 2:12-20

Yesu ni Mfalme wa wafalme na Maria ni Mama wa Mfalme huyu, hivyo ni Malkia. Ukisoma Biblia Agano la Kale hasa kitabu cha Wafalme utaona kuwa kihistoria mama wa Mfalme alikuwa na Cheo kilichotambulika kisheria katika Ufalme wa Daudi. Mfalme Sulemani ndie aliyeanzisha cheo hiki. 1 Wafalme 2:12-20….

Baada ya Ufalme wa Sulemani wafalme waliomfuata waliendeleza mila hii. Mama wa Mfalme ndie alikuwa msiri wa Mfalme, mshauri mkuu na cheo chake kilikuwa muhimu sana kiasi kwamba majina ya Malkia wote yaliorodheshwa katika kitabu cha Wafalme wa Yuda (1Wafalme 14:21, 15:13, 2 Wafalme 12:1, 14:2, 15:2, nk)

Zaburi 45:9, 1 Wafalme 2:17, 20. Mfalme hamkatalii Malkia chochote kwa mila za Wayahudi.

1 Wafalme 2:18. Malkia anawaombea watu wake.

1 Wafalme 2:19 Mfalme anamheshimu Malkia kwa kumketisha mkono wake wa kuume.

2 Kumb 22:10 – Malkia anaweza kufanya mambo makubwa katika utawala wa Mwanae (hata kuangamiza ufalme wote kama akikasirika. Andiko hili halikuwekwa kwenye Biblia kwa bahati mbaya. Tunaye Malkia katika Agano Jipya, huyu wa Agano la Kale ni kivuli / kiashiria tu cha mambo ya umilele.

Ndugu wa Yesu je????

Ezekiel 44:2. Ezekiel anatabiri kuwa hakuna binadamu atakayepitia mlango atakaopitia Bwana kuingia ulimwenguni. Huu ni utabiri kuwa Maria ni Bikira daima. Mama Maria hana watoto wengine kimwili ila ni Yesu tu. Mt. Yosef kama Myahudi mcha Mungu (Roho Mtakatifu anamwita “mtu wa haki” – Mathayo 1:19) alifahamu andiko hili vizuri sana, na alipofahamu kuwa mimba aliyo nayo Maria ni kwa uwezo wa Roho Mtakatifu, alijua kuwa asingeweza au kuthubutu kumkaribia Maria kimwili kamwe maisha yao yote.

Yohana 7: 3-4, Marko 3:21. Wadogo zake Yesu wasingeweza kumgombeza kaka yao mkubwa kama kweli ni ndugu wa tumbo moja kwa sababu kufanya hivyo kwa mila za Wayahudi ni ukosefu mkubwa wa nidhamu.

Yohana 19:26-27. Maria angekuwa na watoto wengine Yesu asingeweza kumrithisha Mama yao kwa rafiki yake Yohana ilhali watoto wengine wapo, hiyo ni kukiuka mila za Wayahudi na kuwadharau ndugu zake. (Tunajua kuwa Yosef alishafariki dunia Yesu akiwa na miaka 29, kabla hajaanza kazi yake rasmi, hivyo Maria alikuwa mjane wakati huu (alikuwa na umri wa miaka kama 50 hivi), na alihitaji mwangalizi. Japo pia hapa Yesu alikuwa na maana pana zaidi ya kiroho kwa kumpa Mama yake kwa ‘yule mwanafunzi aliyempenda).

Yohana 19:25, Maria mke wa Kleofasi ni dada wa Bikira Maria. Mathayo 27:61, 28:1 – Maria mke wa Kleofasi ndie Yule “Maria mwingine:.

Mathayo 27:56; Marko 15:47. Maria mke wa Kleofasi ni mama wa Yakobo na Yosef. Hivyo hawa ni binamu zake Yesu na sio wadogo zake kwa mama mmoja.

Mahali pengine neno “ndugu” linatumika bila kumaanisha ndugu wa damu mfano,

Luka 1:36,           Luka 22:32,              Matendo 1:12-15, 23, 32, 28:17, 21.               Warumi 7:26, 11:1, 13:15, 38, 15:3, 23, 32, 28:17, 21.               Warumi 9:3,          Mwanzo 11:26-28, 13:8, 14:14, 16, 29:15.                                2 Samweli 1:26,                         1 Wafalme 9:13, 20, 32.                           Tobiti 5:11,                         Amosi 1:9.

CHANZO CHA HABARI NI http://mkatolikileotafakari.blogspot.com/